Loksins gómuðu þeir Bobby Fischer!

Það berast gleðifréttir frá Japan þar sem geðsjúklingurinn og brjálæðingurinn Bobby Fischer var loksins gómaður, en eins og menn vita hefur hann um árabil verið eftirlýstur vegna brota á viðskiptabanninu við Júgóslavíu (1992 minnir mig), þegar hann tefldi við Spasskij á júgóslavneskri grundu. Hugsið ykkur, hann TEFLDI VIÐ SPASSSKÍJ!!

Þegar mesta fögnuðinum lýkur geta menn etv. einhent sér af krafti í að góma aðra tvo glæpamenn en félagarnir og stríðsglæpamennirnir Radovan Karadzic og Ratko Mladic ganga enn lausir. Þeir hafa verið ákærðir fyrir tilraun til þjóðarmorðs og glæpi gegn mannkyninu með starfrækslu útrýmingarbúða, pyntingum, skipulögðum nauðgunum og fjöldamorðum, m.a. fyrir að hafa fyrirskipað morð á 6.000 múslimum í Srebrenica.

Er það ekki fullkomin hræsni að handtaka og ákæra Bobby Fischer í ljósi þess að bæði þessi mannskrímsli geta um frjálst höfuð strokið?